Муҳлати истифодаи шаҳодатномаи ронандагии намунаи нави биометрӣ 10 сол буда, онро метавон дар қаламрави 166 кишвари дунё истифода бурд.
Хадамоти консулии сафорати Тоҷикистон дар Россия аз 2 феврали соли равон хизматрасонии навро доир ба иваз намудани шаҳодатномаҳои ронандагии нусхаи куҳна ба шаҳодатномаҳои ронандагии нусхаи нави биометрӣ ба роҳ монд.
Бино ба иттилои Вазорати корҳои хориҷии ҶТ, минбаъд ба шаҳрвандони Тоҷикистон, ки дар ҳудуди Россия қарор доранд, имконият фароҳам шуд, то дар қаламрави ин кишвар шаҳодатномаи ронандагии намунаи нави биометриро дастрас намоянд.
Барои дастрас кардани шаҳодатномаи ронандагии намунаи нави биометрӣ ба хадамоти консулгарии сафорат пешниҳоди ҳуҷҷатҳои зерин зарур аст: маълумотномаи тиббӣ; нусхаи шиносномаи дохилӣ ё хориҷӣ; шаҳодатномаи ронандагӣ; расиди пардохти маблағ ($100). Муҳлати омода гардидани шаҳодатномаи ронандагии намунаи нави биометрӣ 14 рӯзи кориро дар бар мегирад.
Дар маълумоти Вазорат қайд мешавад, ки бартарияти шаҳодатномаи ронандагии намунаи нави биометрӣ дар қаламрави Федератсияи Россия дар он аст, ки дорандаи он метавонад бо супоридани 3 имтиҳон – назарияи қоидаҳои ҳаракати роҳ, рондани автомобил дар майдони махсус (автодром) ва рондани автомобил дар шаҳр соҳиби шаҳодатномаи ронандагии Федератсияи Россия гардад.
Зимнан зикр мегардад, ки шаҳодатномаҳои ронандагии намунаи нави биометрӣ мутобиқи стандартҳои байналмилалӣ омода гардида, муҳлати истифодаи он 10 сол аст.
Презентация новой услуги Консульства Таджикистана в России в Посольстве РТ в РФ. Фото: пресс-служба Посольства РТ в России
Дорандаи шаҳодатномаи ронандагии намунаи нави биометрӣ дар асоси стандартҳои байналмилалӣ, метавонад онро дар қаламрави 166 кишвари дунё истифода барад. Аммо дар Русия шуруъ аз моҳи июни соли 2017 қоидаи нав ҷорӣ карда шуд – агар шумо ба сифати ронанда кор кунед, пас соли 2018 кори қонунӣ бо шаҳодатномаи ронандагии хориҷӣ ғайриимкон мебошад, аз ин ру, онро ба шаҳодатномаи россияги иваз кардан зарур аст.
Робита бо Хадамоти консулгарии Тоҷикистон дар Русия ва адресҳои онҳоро дар сомонаи мо дар бахши Тамосҳои муҳим дарёфт карда метавонед.
Хабарҳои моро дар Telegram пайгирӣ намоед, ба шабакаи мо бо суроғаи https://t.me/asiaplus ҳамроҳ шавед.
